<> قصة خلود و محمد قصه جميله وحزينه <>

قصة خلود ومحمد قصه جميله وحزينه

حبيت أنزل لكم قصة حلوه واتمنى تعجبكم وقولولي رايكم اذا عجبتكم (منقول )
قصة جميلة جدا ومعبرة
خلود & محمد
البلد : البحرين ..
كانت خلود جالسه قدام دريشتها وفي ايدها صورة حبيبها أحمد وقاعده تغني في اسم أحمد .. وهي سرحانه تسمع صوت من دريشه لي شقه الي قدامها .. محمد : الله صوتج وايد حلو .. ويفتح الدريشه ولا يطالعها . خلود : ويعه وانت شكو .. تسمع على بنات خلق الله .. محمد : انا اسف انا كنت يم الدريشه ابي افتحها وسمعت صوتج .. خلود : مو انا كنت متوقعه انا شقه الي قدمنا مافيها احد فاضيه .. محمد : أي لانه تونا ساكنين اليوم .. خلود : زين خلاص لا تطولها .. يالله سكر دريشتك .. محمد : وليش تسكرين علي حياتي .. خلود : شكو دريشه في حياتك ؟؟ محمد : لانه منها القى ما بقى من حياتي .. خلود : اوووووه شكلك مينون .. انا ابي اسكر دريشتي وارتاح منك .. ( وتسكر الدريشه ) ويبقى محمد عند دريشته يطالع لي سماء وهو سرحان .. وتم خلود تتابع محمد من وراه ستار دريشتها وهو ما يدري عنها وتستغرب سرحان محمد طويل لي سماء وهو جالس يكتب في دفتر كان ما يفارق ايده .. وبعد اربع ايام فتحت خلود الدريشه قصدت منه تهويت الغرفه وفي ايدها الثانيه تليفونها النقال تكلم فيه أحمد .. خلود : أحمد شفيك صار لك مده ما تكلمني شنو الي مغيرك علي أحمد : ( بدون نفس ) مافي شي .. خلود : شنو مافيه شي انا مزعلتك يا أحمد .. أحمد : اوووه تراج اذيتيني وياج ما عندي غيرج يعني !!! خلود : أحمد انت شنو قاعد تقول ؟؟ أحمد : اقول خلود انا مشغول مع السلامه .. خلود : بس أحمد .. ( ويسكر التليفون ) ( ويفتح محمد الدريشه وهو حاط على ظهره بطانيه صوف وبايده المرتعشه ماسك دفتره ويطالع لي سماء ويكتب في دفتر وملامح ويها تبين عليه التعب ) و خلود ( ماسكه في ايدها التليفون وفي ايد ثاني حطتها على راسها وتفكر ) محمد : ( يطالع لي خلود وبصوت ضعيف ) صباح الخير .. خلود : ( تطالعه ) نعم .. محمد : اسف على الازعاج بس حسيت من المفروض علي اصبح على جارتنا .. خلود : هذا انتم يا الشباب ما تشوفون بنت الا .. ويقاطعها صوت مسج من أحمد وتفتحه بسرعه ( خلود خلاص انسيني انا لقيت غيرج مع السلامه ) وتنصدم خلود من أحمد وتحاول تدق عليه ويقاطعها صوت مسج ثاني .. ( خلود تراني عطيت خطي حق ولد خالتي لا تحاولين تدقين علي ) ومن هول ما شافت يطيح التليفون من ايدها الى ارض العماره ويتكسر .. وتنزل الدمعه من عين خلود وهي ساكته ما تعرف شنو تسوي ؟؟؟ محمد : عسى ما شر شنو السالفه ؟؟ خلود : ( بنظرات حقد ) انتم كلكم نفس بعض الله ياخذكم ويحرقكم مثل ما حرقتوا قلبي محمد : بس انا .. ( وتسكر دريشة غرفتها بقوه لي درجة انه تكسر زجاج الدريشه ) تعب محمد شوفت خلود جي .. وحس انه يضايقها وعزم انه ما يفتح دريشته لما يشوفها .. علشان ما يضايقها .. وتم على هذا مده مو قصيره .. ومن ناحيه ثانيه كانت خلود حزينه على الي سواه أحمد فيها وكانت تفكر وتراج كلامه خافت انه في كلمه قالتها له وضايقته فيها .. بس ما لقت شي ما عمره طلب منها شي غير انه عطته بدون حدود ولا كانت تنطر منه كلمة شكر وكان هو بعد بخيل فيه لها .. وبعد فتره حست بعدم خروج محمد لي دريشته الي كان متعود عليها وكانت تنطره فتره على اقل تتاسف له على سوته علشانه .. بس ما شافته وصارت تنطره عن دريشه فترات طويله من النهار بس ما طلع ولا اقترب من دريشة .. وفي يوم كانت مستعجله تبي تلحق على باص المدرسه فتحت دريشتها ولقته توه فاتح دريشته ولما شافها كان يبي يسكرها .. خلود : لحظه لحظه .. محمد : يفتح الدريشه .. هلا ؟ خلود : شوف في كلام ودي اقوله لك بس انا مستعيله الحين اكلمك العصر اوكي الساعه 5 .. يالله مع السلامه لانه باص المدرسه ينطرني تحت محمد : ان شاء الله اذا قدرت مع السلامه .. خلود لا تكفى حاول .. محمد : ان شاء الله .. وتروح خلود لي مدرسه وتعد الساعات علشان تطلع ولما طلعت تمت في غرفتها تطالع الساعه لين تي الساعه 5 ولما يت ركضت لي دريشتها وفتحتها بس ما شافت محمد عند الدريشه .. جلست قدام الدريشه تنطر وتمر الدقيقه وراى الدقيقه وتجري الساعه وراى الساعه وينزل ظلام الليل على سماء البحرين وتزيد ظلمة غرفة محمد ظلمه لين يت الساعه 10 بليل وقالت خلود حق نفسها اكيد هو زعلان ولا منحرج مني ولا راح يجي ابي اسكر الدريشه وانطره بكره وتسكر دريشتها وتحس بنور من غرفة محمد وترد وتوخر الستاره عن الدريشه وتشوف ام محمد تفتح الدريشه ويدخل محمد لي غرفته على كرسيه المتحرك ويقترب من الدريشه وتحط بطانيه صوف على كتف محمد وترسم على جبهته قبله من شفات امه وتطلع من الغرفه ويقترب محمد لي دريشه وعينه الى سماء ويتمتم في كلامات وتنزل من عينه دمعه .. وتفتح خلود الدريشه خلود : ( بصوت خفيف ) قوه محمد : ولا يحس فيها .. خلود : ( تعلي في صوتها ) قوووه .. محمد : يلتفت لها ويمسح ما نزل من خده من دموع .. هلا اسف ما انتبهت عليج .. واعذريني لما تاخرت عليج بس ما كان في ايدي توني جاي .. خلود : لالا مو مهم اهم شي انك رديت .. بس انت شنو قاعد تقول حق روحك .. اشوف شفاتك تتحرك وتنزل دمعه من عينك .. محمد : اقول ( ابتسم واضحك تره الدنيا حلوه ) خلود : الله وايد حلو كلامك .. محمد : مشكوره هذا كلام اقص على روحي فيه .. خلود : وليش تقص على روحك .. محمد : مو مهم تعرفين .. ولا ودي اقوله لانه وايد يعذبني .. خلود : على راحتك وعلى العموم انا كان ودي اتاسف لك على الي صار هذاك اليوم .. محمد : يعني انا ما كنت مضايقج .. خلود : هي مو سالفت مضايقني بس كنت .. محمد : كنتي متزاعله مع أحمد .. خلود : لا حنا خلاص افترقنا .. وانا مو متحسفه عليه لانه هو الخسران خسر قلب كان يحبه .. محمد : واليوم .. خلود : اكره .. اكره على كثر ما حبيته .. اكره .. والله اكره .. محمد : لا تحلفين الي يحب ما عمره يكره .. خلود : والله اكره يا .. محمد : محمد .. خلود : عاشت الاسامي يا محمد .. وانا اسمي خلود .. محمد : عاشت ايامج .. وعاشت الاسامي يا خلود .. خلود : تسلم .. خلاص يا محمد لو سمحت لا تذكرني فيه .. زين ابي اسئلك سؤالين ممكن ؟ محمد : أي حاضر .. خلود : انا كل مره اشوفك اشوف وياك كتاب هذا ماسكه وياك وتقعد تكتب فيه شنو تكتب ؟؟؟ محمد : اكتب قصص .. هوايه من انا صغير نسيته فتره ورديت لها من سنتين .. خلود : وشنو تكتب وليش رديت لي كتابه ؟؟ محمد : اكتب اشياء وايد كل شي يخطر على بالي ... ورديت له من سنتين بسبت مرضي .. خلود : سؤال ثاني ودي اقوله لك بس مستحيه .. محمد : لا قولي لا تخشين في قلبج .. خلود : انت من متى على .. محمد : على الكرسي .. انتي شفتيني .. خلود : أي مو انا كنت انطر ولما سكيت دريشتي امك دشت غرفتك وانت دشيت وراها وشفتك .. محمد : انا قبل ما كان فيني شي لين سنتين حاشني مرض قعدني على الكرسي هذا ما اقدر امشي منه الا بصعوبة .. خلود : الله يشفيك ان شاء الله .. محمد : ان شاء الله